જેકાર્ડ ડિઝાઇન

સુરત ની ટેકસટાઇલ માર્કેટ માં જેનું નં.૧ સ્થાન આવે છે તેવા જેકાર્ડ ડિઝાઇનમાં કોમ્પ્યુટર પર બેસી સોફ્ટવેરમાં સાડી, ડ્રેસ, કુરતી, ચણીયા ચોળી, શેરવાની જેવા ગારમેન્ટમાં તેમજ હેન્ડલુમની પ્રોડક્ટ જેવી કે, બેડસીટ, ચાદર, સોફા કવર, ઓશિકા ના કવર, પડદાની ડિઝાઇન બનાવવાની રહેતી હોય છે.

જેકાર્ડ ડિઝાઇન કોઈ પણ શીખી શકે છે, કારણ કે ડિઝાઇનને કોમ્પ્યુટર પર બનાવવાની હોય છે અને આજના સમયમાં કોમ્પ્યુટર પર કામ કરવું અને શીખવું એકદમ આસાન અને સરળ છે. તો આવો જાણીએ જેકાર્ડ ડિઝાઇન વિષે…

જેકાર્ડ એટલે ડિઝાઇન વાળું કાપડ બનાવવાનું મશીન. વર્ષોઓથી આપણે ડિઝાઇન વાળું કાપડ બનાવતા આવ્યા છીએ. પહેલાના સમયમાં હાથ વણાટકામ થતું અને ત્યારથી અત્યાર સુધી કાપડ મિકેનિકલ જેકાર્ડ મશીનમાં બનાવતા હતા અને હજી પણ બનાવીએ છીએ. મિકેનિકલ જેકાર્ડમાં પ્રોડક્શન ઓછુ તેમજ ડિઝાઇન કોસ્ટ વધારે આવે છે, સાથે સાથે ડિઝાઇન બદલવામાં પણ ઘણો સમય વેસ્ટ થાય છે, તેને કારણે લોકોએ ઇલેક્ટ્રોનીક્સ જેકાર્ડ ટેકનોલોજી અપનાવી. વેપારી (પાર્ટી)ની જરૂરિયાત પ્રમાણે ડીઝાઇનમાં ફેરફાર કરી શકાય તેમજ પ્રોડક્શન ઝડપી નીકળે છે અને માંગને ઝડપથી પુરી કરી શકાય છે. આજે આપણી સુરતની ટેક્ષટાઈલ ઇન્ડસ્ટ્રીમાં સાડી, ડ્રેસ, કુરતી, ચણીયા ચોળી, શેરવાની જેવા ગારમેન્ટમાં તેમજ હેન્ડલુમની પ્રોડક્ટ જેવી કે બેડસીટ, ચાદર, સોફા કવર, ઓશિકાના કવર, પડદાનું કાપડ ઇલેક્ટ્રોનીક્સ જેકાર્ડમાં બનાવવામાં આવે છે, તેમજ સાડીના લેસ બનાવવા માટે સ્પેશિયલ નીડલ જેકાર્ડ, મહારાણી જેકાર્ડ ની ટેકનોલોજી અપનાવેલી છે.

જેકાર્ડ ડિઝાઇન એટલે યાર્ન માંથી ડિઝાઇન વાળું કાપડ બનાવવાની એક અદભુત કળા કે જે કાપડનું સર્જન કરે છે, કાપડ બનાવવામાં દરરોજ નવી નવી ડિઝાઇનની જરૂરિયાત રહેતી હોય છે. જેકાર્ડ મશીન માં પહેલા કાપડ બનાવવામાં આવે છે. ત્યારબાદ ગારમેન્ટ બને છે. ફેબ્રીક્સ બનાવવા માટે પેલા કોમ્પ્યુટર પર ડિઝાઇન બનાવવામાં આવે છે, ડીઝાઇન બનાવ્યા બાદ ઇલેક્ટ્રોનીક્સ જેકાર્ડ મશીનમાં ડિઝાઇન ચડાવવામાં આવે છે અને ફેબ્રિકસ બનતું હોય છે, કોમ્પ્યુટર પર ડિઝાઇન બનાવવાથી ડિઝાઇન ઝડપથી બને છે, ફેબ્રિકસનું ફીનીશીંગ સારું આવે છે, મશીન ઉપર વર્ક થતું હોવાને કારણે પ્રોડક્શન પણ ઝડપી આવે છે, એટલા માટે આજના સમયમાં જેકાર્ડ ફેબ્રિકસ સો એ સો ટકા જેકાર્ડ મશીનમાં જ બનાવવામાં આવે છે.